ಕೋಟ : ಸುವಿಕಾ ಸಾಂಸ್ಕೃತಿಕ ಸಂಘಟನೆ, ಕೋಟ ಸಂಸ್ಥೆಯಿಂದ ಮೈಸೂರಿನ ಭಾರತೀಯ ಶೈಕ್ಷಣಿಕ ರಂಗಭೂಮಿ ಮತ್ತು ಮೈಸೂರಿನ ಆರೋಹ ಕನ್ಸ್ಟ್ರಕ್ಷನ್ ಇವರ ಜಂಟಿ ಆಶ್ರಯದಲ್ಲಿ ದಿನಾಂಕ ಜೂನ್ 27 ಹಾಗೂ ಬೆಂಗಳೂರಿನ ಅಜೀಮ್ ಪ್ರೇಮ್ ಜಿ ವಿಶ್ವವಿದ್ಯಾನಿಲಯದ ಆಶ್ರಯದಲ್ಲಿ ಕೋರಮಂಗಲದ ಇಂಡಿಯನ್ ಹೆರಿಟೇಜ್ ಅಕಾಡೆಮಿಯ 'ಕಶ್ಯಪ' ಸಭಾಂಗಣದಲ್ಲಿ ಜೂನ್ 28 ರಂದು ರಾಷ್ಟ್ರೀಯ ರಂಗನಿರ್ದೇಶಕ ಡಾ. ಶ್ರೀಪಾದ್ ಭಟ್ ಅವರ ಪರಿಕಲ್ಪನೆ ವಿನ್ಯಾಸ ನಿರ್ದೇಶನದಲ್ಲಿ ಕೋಟ ಕಾವ್ಯ ಹಂದೆ ಅಭಿನಯದ ಏಕವ್ಯಕ್ತಿ ಪ್ರದರ್ಶನ 'ಹಕ್ಕಿ ಮತ್ತು ಅವಳು' ಕಾವ್ಯಾಭಿನಯದ ಎರಡು ಪ್ರದರ್ಶನಗಳು ನಡೆದವು.
ಕನ್ನಡದಲ್ಲಿನ ಹಾಗೂ ಕನ್ನಡಕ್ಕೆ ಅನುವಾದ ಗೊಂಡಿರುವ ಆಯ್ದ ಕವನಗಳು ಕಥೆಗಳು ಮತ್ತು ಪ್ರಬಂಧಗಳನ್ನು ಆಧರಿಸಿದ 'ಹಕ್ಕಿ ಮತ್ತು ಅವಳು' ಹೆಣ್ಣಿನ ಅಸ್ತಿತ್ವ, ಸ್ವಾತಂತ್ರ್ಯ, ಬಿಡುಗಡೆಯ ಕನಸು, ಹಾಗೂ ಬದುಕಿನ ಸಂಕೀರ್ಣ ಬಂಧನಗಳನ್ನು ಕಲಾತ್ಮಕವಾಗಿ ಅನಾವರಣಗೊಳಿಸುವ ರಂಗ ಪ್ರಯೋಗವಾಗಿದೆ.
ಮೈಸೂರಿನ ಭಾರತೀಯ ಶೈಕ್ಷಣಿಕ ರಂಗಭೂಮಿಯ ಮುಖ್ಯಸ್ಥ ಚೆಲುವ ರಾಜು, ಮಾಜಿ ಕಾರ್ಪೊರೇಟರ್ ರಾಮ್ ಪ್ರಸಾದ್, ಆರೋಹ ಕನ್ಸ್ಟ್ರಕ್ಷನ್ ಎಂ. ಡಿ. ಅಭಿಜಿತ್ ಭಾರದ್ವಾಜ್, ಬೆಂಗಳೂರಿನ ಅಜೀಮ್ ಪ್ರೇಮ್ ಜಿ ವಿಶ್ವವಿದ್ಯಾಲಯದ ಸಂವಹನ ನಿಕಾಯದ ಕನ್ನಡ ಉಪಕ್ರಮಗಳು ತಂಡದ ಸಹ ನಿರ್ದೇಶಕ ಎಸ್. ವಿ. ಮಂಜುನಾಥ್, ಕನ್ನಡ ಉಪಕ್ರಮ ವಿಭಾಗದ ಸಹಾಯಕ ಪ್ರಾಧ್ಯಾಪಕ ರಾಘವೇಂದ್ರ ಹೇರ್ಳೆ ಜಿ., ಉಪಸ್ಥಿತರಿದ್ದರು.
'ಸುವಿಕಾ'ದ ಕುಮಾರಿ ಕಾವ್ಯ ಹಂದೆ ಅಭಿನಯಿಸಿ, ವಿನಿತ ಎಸ್. ಸಂಗೀತ ನಿರ್ವಹಣೆಯಲ್ಲಿ ಸಹಕರಿಸಿ, ನೀನಾಸಂ ಮಧುಸೂದನ್ ಬೆಳಕಿನ ವಿನ್ಯಾಸ ಮಾಡಿದರು. ರಂಗ ಸಜ್ಜಿಕೆಯಲ್ಲಿ ಎಚ್. ಸುಜಯೀಂದ್ರ ಹಂದೆ ಸಹಕರಿಸಿದರು.
