ಕೆನರಾ ಬ್ಯಾಂಕ್ ನಿವೃತ್ತ ಅಧಿಕಾರಿಗಳ ಸಂಘ ಉಡುಪಿ ಘಟಕದ ವತಿಯಿಂದ ನವೆಂಬರ್ 20ರಂದು ಬ್ಯಾಂಕಿನ ಸಂಸ್ಥಾಪಕರಾದ ಅಮ್ಮೆಂಬಳ ಸುಬ್ಬರಾವ್ ಪೈಯವರ 173ನೇ ಜನ್ಮದಿನವನ್ನು ಸಂಸ್ಥಾಪಕರ ಸಂಸ್ಮರಣೆಯಾಗಿ ಸಿಂಡಿಕೇಟ್ ಟವರ್ಸ್ ನಲ್ಲಿ ಆಚರಿಸಲಾಯಿತು.
ಸಂಸ್ಥಾಪಕರ ಭಾವಚಿತ್ರಕ್ಕೆ ಮಾಲಾರ್ಪಣೆ ಮಾಡಿ ದೀಪ ಬೆಳಗಿಸಿ ಕಾರ್ಯಕ್ರಮ ಉದ್ಘಾಟಿಸಲಾಯಿತು.
ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಕೇಂದ್ರೀಯ ಸಮಿತಿ ಪ್ರಧಾನ ಕಾರ್ಯದರ್ಶಿ ಶ್ರೀ ಜೆ.ಎಸ್. ಜಗದೀಶ್ ರವರು ಸಂಘದ ಬೆಳವಣಿಗೆ ಹಾಗೂ ನಿವೃತ್ತ ಪಿಂಚಣಿದಾರರ ಬೇಡಿಕೆಗಳ ಹೋರಾಟದ ಸ್ಥಿತಿ ಗತಿಗಳ ಬಗ್ಗೆ ವಿವರಿಸಿ, ಉಡುಪಿ ಘಟಕದ ಸಮಾಜ ಮುಖಿ ಸೇವಾಕಾರ್ಯ ಚಟುವಟಿಕೆಗಳನ್ನು ಶ್ಲಾಘಿಸಿದರು.
ಈ ಸಂದರ್ಭದಲ್ಲಿ ನಿವೃತ್ತ ಅಧಿಕಾರಿಗಳ ಕೊಡುಗೆಯ ರೂಪದಲ್ಲಿ ಉಡುಪಿಯ ಸರಕಾರಿ ಬಾಲಕಿಯರ ಪ್ರೌಢ ಶಾಲೆಗೆ 1.27 ಲಕ್ಷ ರೂಪಾಯಿ ವೆಚ್ಚದ ಕರಾಟೆ ಮ್ಯಾಟ್ ಗಳನ್ನು ಮುಖ್ಯ ಶಿಕ್ಷಕಿಯವರಿಗೆ ಹಸ್ತಾಂತರಿಸಲಾಯಿತು.
ಇದಲ್ಲದೆ, ಇನ್ನೂ ಮೂರು ಬಾಲಕಿಯರ ಪ್ರಾಥಮಿಕ ಶಾಲೆಗಳ 3.16 ಲಕ್ಷ ರೂಪಾಯಿ ವೆಚ್ಚದ ಅವಶ್ಯಕತೆಗಳನ್ನು ಪೂರೈಸಲು ನಿರ್ಧರಿಸಲಾಯಿತು.
ಕೊಡುಗೆಯನ್ನು ಸ್ವೀಕರಿಸಿದ ಮುಖ್ಯ ಶಿಕ್ಷಕಿಯವರು ಶಾಲೆಯ ಬಹುದಿನದ ಕೊರತೆಯನ್ನು ನೀಗಿಸಿದ್ದಕ್ಕಾಗಿ ಸಂಘಕ್ಕೆ ಕೃತಜ್ಞತೆ ಸಲ್ಲಿಸಿದರು.
ಸಂಘದ ಉಪ ಪ್ರಧಾನ ಕಾರ್ಯದರ್ಶಿ ಯೋಗೀಶ್ ಭಟ್ ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ್ದರು.
ಕಾರ್ಯಕ್ರಮದ ಪೂರ್ವದಲ್ಲಿ ಉಡುಪಿ ಘಟಕದ ನಿಕಟಪೂರ್ವ ಅಧ್ಯಕ್ಷರಾಗಿದ್ದ, ಇತ್ತೀಚೆಗೆ ನಿಧನರಾದ ಪ್ರದೀಪ ಭಕ್ತ, ಸದಸ್ಯರಾಗಿದ್ದ ಎ. ಪ್ರೇಮಾನಂದ ಪೈ ಹಾಗೂ ಲಕ್ಷ್ಮೀಶ ಉಪಾಧ್ಯ ಇವರಿಗೆ ಶ್ರದ್ಧಾಂಜಲಿ ಸಲ್ಲಿಸಲಾಯಿತು.
ಶ್ರೀಮತಿ ಡಿ. ರಾವ್ ಪ್ರಾರ್ಥಿಸಿದರು, ಸಂಘದ ಉಪಾಧ್ಯಕ್ಷ ಶ್ರೀ ಕೆ.ವಿ. ಸಾಯಿರಾಮ್ ರಾಜ್ ಪ್ರಾಸ್ತಾವಿಕ ಮಾತನಾಡಿದರು.
ಶ್ರೀ ಸುಧೀಂದ್ರ ಭಂಡಾರಿ ಸ್ವಾಗತಿಸಿದರು, ಶ್ರೀ ಮೋಹನದಾಸ ನಾಯಕ್ ವಂದಿಸಿದರು.
ಸಂಸ್ಥಾಪಕರು ಪಾಲಿಸಿದ ಜೀವನದ ಧ್ಯೇಯ, ಆದರ್ಶಗಳ ಬಗ್ಗೆ ಮಾತನಾಡಿ ನುಡಿನಮನ ಸಲ್ಲಿಸುವುದರ ಮೂಲಕ ಶ್ರೀ ಮಾರುತಿ ಪ್ರಭು ಕಾರ್ಯಕ್ರಮ ನಿರೂಪಿಸಿದರು.
0 ಕಾಮೆಂಟ್‌ಗಳು